Swydd Wag -- Penodi Cadeirydd - Comisiwn Seilwaith Cenedlaethol Cymru - Cais Saesneg

Diben

Mae Llywodraeth Cymru wedi sefydlu Comisiwn Seilwaith Cenedlaethol Cymru (CSCC) i gefnogi cyngor annibynnol, mwy gwybodus ar strategaeth hirdymor ar gyfer buddsoddi mewn seilwaith, sy’n ymgorffori egwyddorion Deddf Llesiant Cenedlaethau’r Dyfodol (Cymru) 2015.

Llywodraethiant a chylch gwaith

Sefydlwyd CSCC fel corff cynghori anstatudol i ddarparu cyngor ac argymhellion i Weinidogion Cymru ar anghenion seilwaith economaidd ac amgylcheddol Cymru dros 5 - 30 mlynedd.

Mae cylch gwaith y Comisiwn yn canolbwyntio ar anghenion economaidd ac amgylcheddol, ond dylai ystyried hefyd sut mae’r anghenion hyn yn rhyngweithio â ‘seilwaith cymdeithasol’, megis ysgolion, ysbytai a thai. Fodd bynnag, ni ddisgwylir y bydd CSCC yn ystyried a chynghori ar anghenion seilwaith cymdeithasol mewn manylder.

Bydd Llywodraeth Cymru’n amlinellu trwy lythyr cylch gwaith blynyddol y meysydd yr hoffai i CSCC ganolbwyntio arnynt, ynghyd â’r gyllideb sydd ar gael. Bydd y llythyr hwn yn cael ei anfon at Gadeirydd y Comisiwn cyn dechrau pob blwyddyn ariannol.

Bydd y cyngor a ddarperir gan CSCC o natur strategol ac yn edrych i’r dyfodol. Ni ddarperir cyngor ar gynlluniau seilwaith presennol neu gynlluniau sydd i ddod sydd wedi’u cytuno eisoes.

O fewn ei gyngor, rhaid i CSCC adlewyrchu nodau ac egwyddorion Deddf Llesiant Cenedlaethau’r Dyfodol (Cymru) 2015. Mae hyn yn cynnwys:

• Amcanion Llesiant Llywodraeth Cymru
• Y Pum Ffordd o Weithio
• Egwyddor Datblygu Cynaliadwy

Rhaid i CSCC ystyried hefyd rwymedigaethau Gweinidogion Cymru mewn perthynas â Deddf yr Amgylchedd (Cymru) 2016, a rhwymedigaethau deddfwriaethol eraill, wrth ddarparu cyngor.

Bydd trefniadau gwaith manwl CSCC yn cael eu cytuno rhwng Llywodraeth Cymru a’r Comisiynwyr a benodwyd trwy ddogfen Cyfansoddiad. Bydd y cyfansoddiad hwn yn cael ei gefnogi gan lythyrau cylch gwaith blynyddol a fydd yn amlinellu meysydd blaenoriaeth a chyllideb flynyddol CSCC.

Disgwylir i CSCC gynhyrchu a chyhoeddi ‘Adroddiad Cyflwr y Genedl’ bob 3-5 mlynedd. Bydd yr adroddiad hwn yn ystyried cyflwr presennol y seilwaith economaidd ac amgylcheddol ledled Cymru mewn ffordd ddiduedd.

Yn ogystal, disgwylir i’r Comisiwn gynhyrchu adroddiad blynyddol ar ei weithgarwch y flwyddyn flaenorol ac unrhyw adroddiadau ad hoc y bydd Llywodraeth Cymru a/neu CSCC yn ystyried eu bod yn angenrheidiol.

Mae Llywodraeth Cymru wedi ymrwymo i gefnogi annibyniaeth CSCC trwy:

• Ymateb yn ffurfiol i Adroddiad Cyflwr y Genedl a chyflwyno’r adroddiad, a’r ymateb, yn y Cynulliad Cenedlaethol.
• Cyflwyno adroddiadau CSCC yn y Cynulliad Cenedlaethol.
• Ymateb yn ffurfiol i argymhellion CSCC a chyflwyno’r ymateb hwn yn y Cynulliad Cenedlaethol, gan gynnwys y rheswm pam mae argymhellion wedi’u cymeradwyo neu heb eu derbyn.

https://www.legislation.gov.uk/anaw/2015/2/pdfs/anaw_20150002_we.pdf

Bydd y Cadeirydd yn feddyliwr blaenllaw ac yn llais annibynnol ar seilwaith, ac yn gweithio gyda grŵp amrywiol o Gomisiynwyr. Bydd gan y Cadeirydd broffil cyhoeddus amlwg a bydd yn cyflwyno argymhellion CSCC i’r cyhoedd ac i’r Cynulliad Cenedlaethol ac yn profi’r gwaith o gyflawni argymhellion CSCC a dderbynnir gan Lywodraeth Cymru. Bydd y Cadeirydd yn ategu rôl CSCC ac yn creu consensws gyda’r diwydiant a rhanddeiliaid eraill.

Bydd y Cadeirydd yn gyfrifol am:

• arweinyddiaeth strategol CSCC; pennu blaenoriaethau a sicrhau annibyniaeth ei argymhellion; goruchwylio darpariaeth gwaith CSCC, gan gynnwys monitro’r ddarpariaeth gan Lywodraeth Cymru;

• cyfarwyddo mewnbwn Comisiynwyr a manteisio ar eu sgiliau, eu profiad a’u harbenigedd;

• darparu cyngor diduedd, arbenigol i Lywodraeth Cymru ar seilwaith, gan gynnwys cyngor ar flaenoriaethu a gwerth am arian ar fuddsoddiadau cyhoeddus a phreifat;

• creu consensws mewn perthynas ag argymhellion CSCC;

• ymgysylltu â rhanddeiliaid, gan gynnwys llywodraeth, diwydiant, y byd academaidd, grwpiau â buddiant a’r cyhoedd;

• creu perthynas waith â Chomisiwn Seilwaith Cenedlaethol y DU;

• cynrychioli CSCC yn gyhoeddus, gan gynnwys yn y cyfryngau

 

• gweithio gyda Llywodraeth Cymru i sicrhau bod tîm cymorth addas ar waith i ddarparu dadansoddiad a chyngor a/neu waith comisiwn cadarn i CSCC yn ôl yr angen  

Mae Llywodraeth Cymru yn cydnabod pwysigrwydd datblygu a chynyddu sgiliau dwyieithog o fewn apwyntiadau cyhoeddus, ac yn croesawu ceisiadau gan ymgeiswyr sy’n medru gweithio yn y Gymraeg a’r Saesneg.  Seiliwyd y rhestr isod o ofynion iaith y swydd ar asesiad gwrthrychol y corff sy'n recriwtio o’r sgiliau yn y Gymraeg sy’n angenrheidiol i ymgymryd â dyletswyddau’r swydd benodol hon.

Meini Prawf Hanfodol

Gallu

• arweinydd o safon uchel, gyda’r gallu i arwain byrddau a sefydliadau’n effeithiol;

• y gallu i ddarparu cyngor annibynnol, cadarn o dan lefel uchel o graffu a diddordeb cyhoeddus a defnyddio proffil cyhoeddus i greu consensws;

• hygrededd gyda llywodraeth, diwydiant a’r cyhoedd;

• y gallu i brosesu gwybodaeth gymhleth, ystyried pethau o safbwynt tymor hir a phwyso a mesur tebygolrwydd i ddod i gasgliadau clir;

• y gallu i gyfathrebu pynciau cymhleth yn glir;

• dealltwriaeth o amcanion seilwaith Llywodraeth Cymru, ei fframwaith polisi, cyflawni ac ariannu ehangach, gan gynnwys y dyletswyddau a’r ymrwymiadau o dan Ddeddf Llesiant Cenedlaethau’r Dyfodol (Cymru) 2015 a’r setliad datganoli.

Profiad

• profiad o arweinyddiaeth strategol ar lefelau uwch mewn llywodraeth neu yn y byd academaidd neu fusnes;

• profiad o gyfathrebu a dylanwadu ar y lefelau uchaf;

• y gallu i gynrychioli sefydliadau yn gyhoeddus, gan gynnwys yn y cyfryngau a gyda gwahanol randdeiliaid;

 

• profiad mewn un sector neu fwy ym maes seilwaith economaidd a/neu amgylcheddol (dymunol)

04/03/18 23:55

Bydd 12 o bobl ar y Comisiwn: y Cadeirydd ac 11 o Gomisiynwyr – ar gyfer 3 swydd yn y Comisiwn, mae sgiliau Cymraeg yn hanfodol, ond nid ydynt yn ofynnol ar gyfer y 9 swydd arall.

I wneud cais, ewch i wefan penodiadau cyhoeddus Llywodraeth Cymru yma: https://cymru-wales.tal.net/vx/lang-cy/mobile-0/appcentre-3/brand-2/xf-8d1f9e73671f/candidate/jobboard/vacancy/7/adv/ 

I wneud cais am y swydd hon, cliciwch ar y swydd Comisiynwyr Comisiwn Seilwaith Cenedlaethol Cymru ac yna ar ‘Gwneud Cais’ yn y gornel waelod ochr chwith. Y tro cyntaf y byddwch chi’n gwneud cais am swydd, bydd angen i chi lenwi ffurflen gofrestru ar gyfer system ymgeisio ar-lein Llywodraeth Cymru. Dim ond unwaith y bydd angen i chi gofrestru, a gallwch ddilyn eich cais, ac unrhyw geisiadau eraill rydych chi wedi’u gwneud, drwy’r system trwy eich cyfrif cofrestredig. 

Ar ôl i chi gofrestru, gallwch gael mynediad at y ffurflen gais. I wneud cais, bydd angen i chi lanlwytho datganiad personol a CV i’r adran ‘Rhesymau dros wneud cais’ ar y ffurflen gais ar-lein.