Swydd Wag -- Arweinydd Tîm Cyfieithu Deddfwriaeth

Dyma swydd broffesiynol yng Ngwasanaeth Cyfieithu Llywodraeth Cymru sy’n gofyn am gyfuniad o sgiliau gwas cyhoeddus craff ac ieithydd profiadol. Mae hon yn un o ddwy swydd Arweinydd Tîm Cyfieithu Deddfwriaeth sy’n atebol i Bennaeth yr Uned Cyfieithu Deddfwriaeth ac sy’n gyfrifol am:

• arwain y ddarpariaeth cyfieithu deddfwriaeth ar gyfer gwaith meysydd pwnc a phortffolios Gweinidogol penodol
• rheoli llif gwaith y tîm
• arwain a rheoli tîm o gyfieithwyr mewnol
• rheoli a defnyddio contractau gyda chyflenwyr allanol
• datblygu a gwella’r gwasanaeth cyfieithu a ddarperir i gwsmeriaid.

Arwain ar gyflenwi gwasanaethau cyfieithu

• Bod yn atebol am bob agwedd ar y gwasanaethau cyfieithu a ddarperir gan y tîm ar gyfer meysydd pwnc a phortffolios Gweinidogol penodol er mwyn cefnogi’r Llywodraeth i ddiwallu anghenion cyfieithu deddfwriaeth Llywodraeth Cymru.
• Meithrin perthynas â chwsmeriaid allweddol a deall patrymau gwaith cwsmeriaid y portffolio, yn enwedig Swyddfa’r Cwnsleriaid Deddfwriaethol a’r Adran Gwasanaethau Cyfreithiol, gan gynllunio gwaith y tîm ar sail y gofynion.
• Cydweithio’n effeithiol o fewn y Gwasanaeth Cyfieithu ag arweinyddion timau eraill a swyddogion Uned Fusnes y Gwasanaeth gan sicrhau cysondeb arferion gwaith ar draws y Gwasanaeth.
• Rheoli a monitro contractau cyfieithu a sefydlwyd ar gyfer y tîm o dan Gytundeb Fframwaith y Gwasanaeth Caffael Cenedlaethol, a chyfathrebu’n effeithiol â’r cyflenwyr i gomisiynu gwaith.

Defnyddio adnoddau’n effeithiol

• Cadw’n driw at gylch gwaith penodedig y Gwasanaeth Cyfieithu er mwyn defnyddio adnoddau cyfieithu i’w llawn botensial ac yn unol â blaenoriaethau’r sefydliad.
• Dadansoddi ceisiadau’n fanwl, gofyn am arweiniad yn ôl y galw ar y lefel briodol a thrafod ceisiadau gydag arweinwyr y timau cyflenwi eraill a chyda’r swyddogion perthnasol er mwyn sicrhau cysondeb polisi cyfieithu ar draws y Gwasanaeth cyfan.
• Cynllunio, trefnu a goruchwylio gwaith y tîm er mwyn sicrhau bod yr adnoddau sydd ar gael, yn adnodd mewnol ac allanol, yn cael eu defnyddio’n effeithlon. Mae hyn yn cynnwys gweithio gyda'r Uned Fusnes i ddyrannu llwyth gwaith i bob unigolyn yn briodol ac yn effeithlon gan gynnwys penderfynu rhoi'r gwaith ar gontract cyfieithu allanol ai peidio.
• Deall gwerth y dechnoleg gyfieithu a manteisio arni i’r eithaf i hwyluso’r broses gyfieithu ac i ddarparu gwasanaeth effeithlon, gan gyfrannu at gaffael systemau newydd a datblygu systemau.
• Cydweithio ag Uned Ddatblygu’r Gwasanaeth i gynllunio’n effeithiol ar gyfer safoni terminoleg ddeddfwriaethol briodol ac i fonitro a chynnal ansawdd y gwaith cyfieithu.

Rheoli tîm

• Bod yn rheolwr llinell ar Uwch-gyfieithwyr y tîm. Gosod safonau ansawdd a llwyth gwaith ar gyfer y tîm; monitro allbwn a pherfformiad a chymryd camau priodol i gywiro unrhyw ddiffyg.
• Arwain a rheoli drwy esiampl a chyfathrebu’n effeithiol â thîm o gyfieithwyr proffesiynol sy’n gweithio ar wasgar ledled y wlad.
• Sicrhau bod y tîm yn gweithio yn unol â gweithdrefnau a systemau’r gangen.
• Annog y cyfieithwyr i ymroi i’w datblygu eu hunain yn barhaus fel proffesiynolion cyfieithu ac fel gweision cyhoeddus yn Llywodraeth Cymru.

Cydweithio a chyfrannu

• Cydweithio ag arweinyddion tîm eraill y Gwasanaeth Cyfieithu – ee, ar brosiectau biliau ac ar waith a rennir gan y ddwy uned.
• Cydweithio â’r Uned Ddatblygu ar ddatblygiadau o ran caffael a datblygu systemau technoleg, safoni terminoleg ac ansawdd.
• Cydweithio â Swyddfa’r Cwnsleriaid Deddfwriaethol a’r Adran Gwasanaethau Cyfreithiol (ac adrannau polisi a chyrff allanol eraill fel y bo’r angen) er mwyn datblygu offer TG i gynorthwyo’r broses ddrafftio, ac er mwyn casglu, cysoni, safoni a rhannu termau deddfwriaethol.
• Rhoi cyngor proffesiynol arbenigol ar faterion sy'n ymwneud â gwaith ieithyddion deddfwriaethol i gydweithwyr ar bob lefel yn Llywodraeth Cymru.
• Ymgymryd ag ystod eang o wasanaethau cyfieithu a ddarperir gan y tîm, fel y bo dyletswyddau eraill yn caniatáu, er enghraifft gwaith mwy cymhleth a thra sensitif.
• Cyfrannu ar gais rheolwyr y Gwasanaeth at brosiectau cyfieithu neu gorfforaethol yn ôl y gofyn.

• Cyfle i ddatblygu’r gallu i reoli a datblygu staff.
• Cyfle i arwain tîm o gyfieithwyr deddfwriaethol proffesiynol yn un o wasanaethau cyfieithu mwyaf Cymru. Mae’r swydd hon yn swydd allweddol i ddiwallu anghenion cyfieithu deddfwriaethol Llywodraeth Cymru.
• Cyfle i gydweithio’n agos â chwnsleriaid deddfwriaethol, cyfreithwyr a chwsmeriaid eraill i ddiwallu anghenion cyfieithu deddfwriaethol Llywodraeth Cymru. 
• Cyfle i gyfrannu ar lefel arweinydd i waith proffesiwn sy’n hanfodol i agenda Llywodraeth Cymru o ran hyrwyddo a hybu’r defnydd o’r Gymraeg, mewn cangen sy’n gweithio’n gyfan gwbl drwy gyfrwng y Gymraeg o fewn y sefydliad.
• Cyfle i ddatblygu sgiliau iaith arbenigol mewn cyfieithu deddfwriaethol, gan gyfuno sgiliau iaith proffesiynol â swyddogaeth gwas cyhoeddus yn Llywodraeth Cymru.

04/01/22 16:00

Mae swyddi sy’n rhan o'r ymgyrch recriwtio hon yn agored ar y cyfan i wladolion y DU, y rhai sydd â'r hawl i aros a gweithio yn y DU a'r rhai sy'n bodloni Rheolau Cenedligrwydd y Gwasanaeth Sifil yn unig. Gwiriwch eich cymhwystra yma:

• Fisâu a Mewnfudo y DU - GOV.UK (Saesneg yn unig)
• Rheolau Cenedligrwydd – GOV.UK (Saesneg yn unig)

Cyn cael ei benodi, bydd yn ofynnol i bob ymgeisydd llwyddiannus gyflwyno dogfennau gwreiddiol, derbyniol fel rhan o'r gwiriadau cyn cyflogi. Os daw’n amlwg yn nes ymlaen yn y broses nad ydych chi’n gymwys i wneud cais, bydd eich cais neu’r cynnig yn cael ei dynnu’n ôl.

Mae Llywodraeth Cymru wedi ymrwymo i ddarparu gwasanaethau sy’n croesawu amrywiaeth ac sy’n hyrwyddo cyfle cyfartal. Mae hyn yn seiliedig ar Ddeddf Cydraddoldeb 2010 a bydd yn dilyn hyn ym mhob cam o’r broses recriwtio. Ein nod yw sicrhau bod yr ymrwymiadau hyn hefyd yn cael eu hymwreiddio yn ein harferion gwaith bob dydd gyda’n holl gwsmeriaid, cydweithwyr a phartneriaid.

Rydym wedi ymrwymo i fod yn sefydliad gwrth-hiliol a chynyddu amrywiaeth yn Llywodraeth Cymru, gan ddileu rhwystrau a chefnogi’n holl staff i gyflawni eu potensial. Rydym yn ymroi i recriwtio pobl Dduon, Asiaidd ac Ethnig Lleiafrifol a phobl anabl sydd heb gynrychiolaeth ddigonol yn Llywodraeth Cymru ar hyn o bryd.

Rydym yn croesawu ceisiadau gan bawb waeth beth fo’u hoedran, statws priodasol a phartneriaeth sifil (yn cynnwys yr un rhyw a’r rhyw arall), nam neu gyflwr iechyd, rhywedd, cyfeiriadedd rhywiol, beichiogrwydd a chyfnod mamolaeth, hil, crefydd neu gred, hunaniaeth o ran rhywedd neu fynegiant rhywedd.

Rydym yn Hyrwyddwr Amrywiaeth Stonewall, yn sefydliad Hyderus o Ran Anabledd Lefel 3 (Arweinydd). Mae pump Rhwydwaith Staff a noddir gan y Bwrdd yn allweddol i gefnogi’r gwaith hwn a darparu cefnogaeth i gymheiriaid (Ymwybyddiaeth a Chymorth Anabledd (DAAS); Rhwydwaith Staff o Leiafrifoedd Ethnig (MESN); Materion y Meddwl (Iechyd a lles meddyliol); PRISM (Pobl lesbiaidd, Hoyw, Deurywiol, Trawsryweddol, Rhyngrywiol +) a Menywod Ynghyd.

 

Mae Llywodraeth Cymru wedi mabwysiadu’r diffiniad cymdeithasol o anabledd, lle cydnabyddir bod rhwystrau mewn cymdeithas yn gweithredu i analluogi pobl sydd â namau neu gyflyrau iechyd, sy’n niwrowahanol neu sy’n defnyddio Iaith Arwyddion Prydain. Rydym wedi ymrwymo i ddileu rhwystrau fel bo pob aelod staff (neu ddarpar staff newydd) yn gallu cyflawni hyd eithaf eu gallu.

Rydym yn gwarantu cyfweliad i unrhyw berson anabl y mae ei gais yn bodloni’r meini prawf gofynnol ar gyfer y swydd. ‘Meini prawf gofynnol’ yw bod rhaid i chi ddarparu tystiolaeth ar bob cam o’r broses asesu cyn cyfweliad sy’n dangos eich bod yn bodloni’r gofynion yn y disgrifiad swydd yn gyffredinol. Rydym wedi ymrwymo i gyflogi a datblygu gyrfa pobl anabl.

Os oes gennych nam neu gyflwr iechyd, yn niwrowahanol neu’n defnyddio Iaith Arwyddion Prydain ac am drafod addasiadau rhesymol ar gyfer unrhyw ran o’r broses recriwtio hon, neu drafod sut y byddwn yn rhoi addasiadau ar waith pe baech yn llwyddo, e-bostiwch RecriwtioAllanol@llyw.cymru cyn gynted â phosibl a bydd aelod o’r tîm yn cysylltu â chi i drafod eich gofynion ac unrhyw gwestiynau sydd gennych.

 

Mae’r swydd wag hon yn rhan o’r fenter Gweithle Gwych i Gyn-Aelodau’r Lluoedd Arfog. 

Mae Llywodraeth Cymru yn sefydliad dwyieithog, ac mae sgiliau Cymraeg yn gaffaeliad i ni.  Rydym yn annog ac yn cefnogi staff i ddysgu, datblygu a defnyddio’u sgiliau Cymraeg yn y gweithle.

Seiliwyd y rhestr isod o ofynion iaith y swydd ar asesiad gwrthrychol y rheolwr llinell ar ran Llywodraeth Cymru, o’r sgiliau yn y Gymraeg sy’n angenrheidiol i ymgymryd â dyletswyddau’r swydd benodol hon.

O fewn Llywodraeth Cymru, mae'r berthynas rhwng y cyflogwr a'r undebau llafur yn seiliedig ar bartneriaeth gymdeithasol. Rydyn ni'n credu mai’r ffordd orau o gyflawni ein nodau yw drwy sicrhau bod rheolwyr ac undebau llafur yn cydweithio.

Ein 3 undeb llafur cydnabyddedig yw:
•         PCS
•         Prospect
•         FDA

Mae cytundeb partneriaeth yn sail i'r berthynas hon. Mae'r cytundeb yn nodi sut y mae ein hundebau yn gweithio gyda Llywodraeth Cymru ar faterion fel:
•         cyflog
•         telerau ac amodau
•         polisïau a gweithdrefnau
•         newid sefydliadol

Mae ein cydweithwyr undebau llafur yn Llywodraeth Cymru yn cydweithio i roi cyfle i'w haelodau gael dweud eu dweud yn y gweithle. Maent yn sicrhau bod buddiannau eu haelodau yn cael eu hyrwyddo a'u diogelu. Maent hefyd yn helpu i leihau anghydraddoldebau a gwella telerau ac amodau.

Mae gan Lywodraeth Cymru hanes blaenorol rhagorol o weithio mewn partneriaeth gyda'i hundebau llafur. Rydyn ni'n annog staff i gymryd rhan. Rydyn ni'n eich cefnogi i ymuno ag undeb llafur cydnabyddedig, i sicrhau bod eich llais yn cael ei glywed yn y gweithle ac i ddysgu mwy am undebau llafur a gwaith partneriaeth.

• Oni nodir fel arall yn y darn 'cyflog cychwynnol gwirioneddol', bydd pob ymgeisydd yn dechrau ar isafswm y raddfa gyflog y penodir iddi (mae hwn yn cynnwys gweision sifil presennol). Does dim modd trafod hyn.
• Oni nodir fel arall yn 'math o gyfle', nid yw'r hysbyseb recriwtio hon ar agor ar sail Benthyciad neu Secondiad.
• Am ragor o wybodaeth am y meini prawf cymhwystra ac amodau a thelerau swyddi Benthyciad a Secondiad yn Llywodraeth Cymru, gweler canllawiau allanol yr ymgeiswyr recriwtio.
• Oni nodir fel arall yn 'Lleoliad y Swydd' dim ond yn y DU y gellir gweithio yn y rôl/rolau y recriwtir iddynt drwy’r ymgyrch hon, ac ni cheir gwneud hynny dramor.

Dylid gwneud pob cais am y swydd hon ar-lein trwy system ymgeisio ar-lein Llywodraeth Cymru.

Os oes gennych nam a fyddai'n eich atal rhag gwneud cais ar-lein, e-bostiwch RecriwtioAllanol@llyw.cymru i ofyn am becyn cais mewn fformat arall, neu i ofyn am addasiad rhesymol sy'n gysylltiedig â nam er mwyn cyflwyno'ch cais .

I wneud cais, bydd angen i chi gael cyfrif ar ein system ymgeisio ar-lein. Cliciwch y botwm 'Gwneud Cais' isod, a gofynnir i chi 'Fewngofnodi' os oes gennych gyfrif eisoes, neu 'Gofrestru' os nad oes gennych gyfrif eto. Gallwch gofrestru mewn ychydig funudau. Bydd angen cyfeiriad e-bost arnoch i allu cofrestru. Ar ôl i chi gofrestru ar gyfer cyfrif a mewngofnodi, cewch eich cyfeirio at y cam cyntaf y broses asesu.

Os hoffech chi wneud cais am y swydd wag hon yn Gymraeg, defnyddiwch y ddolen ‘Newid Iaith / Change Language’ ar frig y dudalen hon, i fynd â chi i fersiwn Gymraeg yr hysbyseb hon, a gallwch ei defnyddio i wneud cais yn Gymraeg.

I gael rhagor o wybodaeth am y broses recriwtio, gweler Canllawiau Recriwtio Ymgeiswyr Allanol.

I gael rhagor o wybodaeth am Ymddygiad a Chryfderau'r Gwasanaeth Sifil a sut y cânt eu defnyddio ar gyfer recriwtio yn y Gwasanaeth Sifil, gweler Proffiliau Llwyddiant y Gwasanaeth Sifil.

Dylai unrhyw un sy’n credu ei fod wedi’i drin yn annheg, neu sydd â chwyn am sut y cynhaliwyd y broses naill ai ysgrifennu at y Pennaeth Adnoddau, Llywodraeth Cymru, Parc Cathays 2, Caerdydd CF10 3NQ neu e-bostio desggymorthcydwasanaethau@llyw.cymru. Os ydych chi’n anhapus â chanlyniad y gŵyn a godwyd gyda Llywodraeth Cymru ac yn teimlo nad yw egwyddorion penodi ar sail teilyngdod drwy gystadleuaeth deg ac agored wedi’u bodloni gallwch gyflwyno’ch cwyn i Gomisiwn y Gwasanaeth Sifil (Saesneg yn unig).