Swydd Wag -- Lleoliad Israddedig Ymchwil Gymdeithasol

Llywodraeth Cymru yw llywodraeth ddatganoledig Cymru. Mae'r Is-adran Ymchwil Gymdeithasol a Gwybodaeth yn rhan greiddiol o swyddogaeth ddadansoddol y Llywodraeth. Mae'r Is-adran yn cynnwys tua 40 o ymchwilwyr cymdeithasol sy'n gweithio'n agos gyda dadansoddwyr polisi a dadansoddwyr eraill (e.e. ystadegwyr, economegwyr) i ddarparu cyngor a thystiolaeth ddadansoddol i gefnogi penderfyniadau polisi allweddol mewn meysydd datganoledig megis addysg, iechyd a'r amgylchedd. Mae dadansoddwyr yn chwarae rhan allweddol yn y gwaith o ddarparu tystiolaeth o safon i gefnogi'r broses o lunio polisïau ac i gefnogi Llywodraeth Cymru yn gyffredinol.

Mae'r swyddi hyn ar agor i israddedigion ar leoliad blwyddyn ryngosod rhwng ail a thrydedd flwyddyn eu cwrs astudio. Bydd yr ymgeiswyr llwyddiannus wedi'u lleoli yn yr Is-adran Ymchwil Gymdeithasol a Gwybodaeth, gan weithio'n agos gydag ymchwilwyr cymdeithasol i gefnogi'r gwaith o ddatblygu a chynnal gwahanol fathau o brosiectau ymchwil. Bydd cyfrifoldebau'r ymgeiswyr llwyddiannus yn amrywio gan ddibynnu ar y tîm; a bydd yr union swyddi yn dibynnu ar ddiddordebau, sgiliau a phrofiadau'r ymgeiswyr llwyddiannus. Mae tair swydd ar gael, pob un wedi'i lleoli mewn tîm gwahanol yn yr Is-adran. Ein nod yw llenwi swyddi yn y timau canlynol:

Swydd Un: yn y Tîm Ymchwil Gorfforaethol

Bydd y rôl hon yn cynnwys gwaith ymchwil a dadansoddi gan ddefnyddio ystod o ddulliau a ffynonellau data i helpu i lywio gwelliannau i'r ffordd y mae Llywodraeth Cymru yn gweithio. Bydd hyn yn cynnwys cynllunio, cynnal ac adrodd ar brosiectau ymchwil sylfaenol (er enghraifft, arolygon) gyda staff a rhanddeiliaid Llywodraeth Cymru yn ogystal â dadansoddi data sefydliadol eraill (megis data gweinyddol). Bydd y swydd hefyd yn cynnwys adolygu tystiolaeth a datblygu canllawiau i'r tîm ar yr arferion gorau i'w defnyddio ym maes ymchwil gymdeithasol. Hefyd, bydd cyfle i helpu gyda chyfrifoldebau corfforaethol, megis llunio bwletinau ar gyfer yr Is-adran Ymchwil Gymdeithasol.

Swydd dau: yn y Tîm Ymchwil Dyfodol Cynaliadwy

Bydd y rôl hon yn cynnwys gweithio'n agos gydag ymchwilwyr ar ystod eang o feysydd, gan gynnwys tai, yr amgylchedd a materion gwledig. Bydd y rôl yn cynnwys helpu i gynllunio, cynnal, dadansoddi ac adrodd ar ymchwil sylfaenol ac eilaidd. Bydd tasgau yn debygol o gynnwys adolygu tystiolaeth, datblygu a gweinyddu arolygon bach ar-lein, a chynorthwyo gydag ymchwil ansoddol. Hefyd, bydd cyfle i helpu gyda chyfrifoldebau corfforaethol, megis darparu cymorth gweinyddol i Bwyllgor Ymchwil Gymdeithasol Llywodraeth Cymru.

Swydd Tri: yn y Tîm Addysg a Gwasanaethau Cyhoeddus

Prif amcan y lleoliad yw rhoi cymorth ymchwil i nifer o brosiectau ymchwil a gwerthuso Llywodraeth Cymru. Bydd angen i'r ymgeisydd llwyddiannus gyfrannu at ddatblygu a chynnal gwahanol fathau o brosiectau ymchwil, megis adolygiadau llenyddiaeth a gwerthusiadau. Bydd y rôl hon yn cynnwys helpu i gynllunio, rheoli ac adrodd ar ymchwil gymdeithasol. Hefyd, bydd cyfle i helpu gyda chyfrifoldebau corfforaethol.

Bydd tasgau allweddol yr ymgeiswyr llwyddiannus yn dibynnu ar ba dîm y cânt eu rhoi ynddo, ond byddant yn cynnwys cyfuniad o'r canlynol: 

• Helpu i reoli gwaith ymchwil a sicrhau ei ansawdd
• Cynorthwyo prosiectau ymchwil sy'n defnyddio dulliau ansoddol (e.e. cyfweliadau manwl, grwpiau ffocws) a dulliau meintiol (e.e. gwaith arolygu, dadansoddi ystadegol, gwybodaeth fonitro ac adrodd)
• Cynllunio, dadansoddi a chyfuno gwaith ymchwil
• Ymchwilio i lenyddiaeth a’i hadolygu
• Gweithio gyda dadansoddwyr ar draws Llywodraeth Cymru
• Darparu cymorth gweinyddol mewn ymarferion casglu data
• Paratoi adroddiadau i'w cyhoeddi ar dudalennau gwe ymchwil gymdeithasol Llywodraeth Cymru neu i'w defnyddio'n fewnol
• Rheoli prosiectau
• Cyflawni tasgau gweinyddol, megis trefnu cyfarfodydd, seminarau a digwyddiadau, cymryd a chadw cofnodion.

Mae'r swyddi'n cynnig cyfleoedd datblygu rhagorol, gan gynnwys:

• Dysgu sut mae ymchwil gymdeithasol yn cael ei chomisiynu, ei chynnal a'i defnyddio o fewn y Llywodraeth a chyrff a ariennir ganddi (e.e. Cyfoeth Naturiol Cymru)
• Datblygu dealltwriaeth o sut mae tystiolaeth yn gallu helpu i lywio a gwella'r broses o lunio polisïau a dulliau gweithio o fewn y sefydliad
• Datblygu sgiliau allweddol (megis sgiliau cyfathrebu, meddwl yn feirniadol a gweithio fel rhan o dîm, yn aml o fewn amserlen dynn)
• Mynychu cyrsiau, cynadleddau a seminarau perthnasol (gan gynnwys cyrsiau ar ddadansoddi meintiol ac ansoddol)
• Cyfleoedd i ddatblygu dealltwriaeth a chael profiad ymarferol o amrywiaeth o dechnegau ymchwil (megis cynllunio arolygon, cynnal cyfweliadau, dadansoddi a chyflwyno canfyddiadau, ysgrifennu adroddiadau ac egluro canfyddiadau ymchwil i gynulleidfa nad yw’n arbenigo yn y maes)
• Datblygu sgiliau rheoli prosiectau
• Cysgodi neu weithio gydag ymchwilwyr cymdeithasol, dadansoddwyr a swyddogion polisi o adrannau eraill yn Llywodraeth Cymru yn ystod y lleoliad. Mae’n bosibl y bydd cyfle hefyd i gydweithio â swyddogion o gyrff a ariennir gan y Llywodraeth.

04/12/20 16:00

Mae swyddi sy’n rhan o'r ymgyrch recriwtio hon yn agored ar y cyfan i wladolion y DU, y rhai sydd â'r hawl i aros a gweithio yn y DU a'r rhai sy'n bodloni Rheolau Cenedligrwydd y Gwasanaeth Sifil yn unig. Gwiriwch eich cymhwystra yma:

• Fisâu a Mewnfudo y DU - GOV.UK (Saesneg yn unig)
• Rheolau Cenedligrwydd – GOV.UK (Saesneg yn unig)

Cyn cael ei benodi, bydd yn ofynnol i bob ymgeisydd llwyddiannus gyflwyno dogfennau gwreiddiol, derbyniol fel rhan o'r gwiriadau cyn cyflogi. Os daw’n amlwg yn nes ymlaen yn y broses nad ydych chi’n gymwys i wneud cais, bydd eich cais neu’r cynnig yn cael ei dynnu’n ôl.

Mae Llywodraeth Cymru wedi ymrwymo i ddarparu gwasanaethau sy’n croesawu amrywiaeth ac sy’n hyrwyddo cyfle cyfartal. Mae hyn yn seiliedig ar Ddeddf Cydraddoldeb 2010 a bydd yn dilyn hyn ym mhob cam o’r broses recriwtio. Ein nod yw sicrhau bod yr ymrwymiadau hyn hefyd yn cael eu hymwreiddio yn ein harferion gwaith bob dydd gyda’n holl gwsmeriaid, cydweithwyr a phartneriaid.

Rydym wedi ymrwymo i fod yn sefydliad gwrth-hiliol a chynyddu amrywiaeth yn Llywodraeth Cymru, gan ddileu rhwystrau a chefnogi’n holl staff i gyflawni eu potensial. Rydym yn ymroi i recriwtio pobl Dduon, Asiaidd ac Ethnig Lleiafrifol a phobl anabl sydd heb gynrychiolaeth ddigonol yn Llywodraeth Cymru ar hyn o bryd.

Rydym yn croesawu ceisiadau gan bawb waeth beth fo’u hoedran, statws priodasol a phartneriaeth sifil (yn cynnwys yr un rhyw a’r rhyw arall), nam neu gyflwr iechyd, rhywedd, cyfeiriadedd rhywiol, beichiogrwydd a chyfnod mamolaeth, hil, crefydd neu gred, hunaniaeth o ran rhywedd neu fynegiant rhywedd.

Rydym yn Hyrwyddwr Amrywiaeth Stonewall, yn sefydliad Hyderus o Ran Anabledd Lefel 3 (Arweinydd). Mae pump Rhwydwaith Staff a noddir gan y Bwrdd yn allweddol i gefnogi’r gwaith hwn a darparu cefnogaeth i gymheiriaid (Ymwybyddiaeth a Chymorth Anabledd (DAAS); Rhwydwaith Staff o Leiafrifoedd Ethnig (MESN); Materion y Meddwl (Iechyd a lles meddyliol); PRISM (Pobl lesbiaidd, Hoyw, Deurywiol, Trawsryweddol, Rhyngrywiol +) a Menywod Ynghyd.

 

Mae’r swydd wag hon yn rhan o’r fenter Gweithle Gwych i Gyn-Aelodau’r Lluoedd Arfog. 

Mae Llywodraeth Cymru yn sefydliad dwyieithog, ac mae sgiliau Cymraeg yn gaffaeliad i ni.  Rydym yn annog ac yn cefnogi staff i ddysgu, datblygu a defnyddio’u sgiliau Cymraeg yn y gweithle.

 

Seiliwyd y rhestr isod o ofynion iaith y swydd ar asesiad gwrthrychol y rheolwr llinell ar ran Llywodraeth Cymru, o’r sgiliau yn y Gymraeg sy’n angenrheidiol i ymgymryd â dyletswyddau’r swydd benodol hon.

O fewn Llywodraeth Cymru, mae'r berthynas rhwng y cyflogwr a'r undebau llafur yn seiliedig ar bartneriaeth gymdeithasol. Rydyn ni'n credu mai’r ffordd orau o gyflawni ein nodau yw drwy sicrhau bod rheolwyr ac undebau llafur yn cydweithio.

Ein 3 undeb llafur cydnabyddedig yw:
•         PCS
•         Prospect
•         FDA

Mae cytundeb partneriaeth yn sail i'r berthynas hon. Mae'r cytundeb yn nodi sut y mae ein hundebau yn gweithio gyda Llywodraeth Cymru ar faterion fel:
•         cyflog
•         telerau ac amodau
•         polisïau a gweithdrefnau
•         newid sefydliadol

Mae ein cydweithwyr undebau llafur yn Llywodraeth Cymru yn cydweithio i roi cyfle i'w haelodau gael dweud eu dweud yn y gweithle. Maent yn sicrhau bod buddiannau eu haelodau yn cael eu hyrwyddo a'u diogelu. Maent hefyd yn helpu i leihau anghydraddoldebau a gwella telerau ac amodau.

Mae gan Lywodraeth Cymru hanes blaenorol rhagorol o weithio mewn partneriaeth gyda'i hundebau llafur. Rydyn ni'n annog staff i gymryd rhan. Rydyn ni'n eich cefnogi i ymuno ag undeb llafur cydnabyddedig, i sicrhau bod eich llais yn cael ei glywed yn y gweithle ac i ddysgu mwy am undebau llafur a gwaith partneriaeth.

• Oni nodir fel arall yn y darn 'cyflog cychwynnol gwirioneddol', bydd pob ymgeisydd yn dechrau ar isafswm y raddfa gyflog y penodir iddi (mae hwn yn cynnwys gweision sifil presennol). Does dim modd trafod hyn.
• Oni nodir fel arall yn 'math o gyfle', nid yw'r hysbyseb recriwtio hon ar agor ar sail Benthyciad neu Secondiad.
• Am ragor o wybodaeth am y meini prawf cymhwystra ac amodau a thelerau swyddi Benthyciad a Secondiad yn Llywodraeth Cymru, gweler canllawiau allanol yr ymgeiswyr recriwtio.
• Oni nodir fel arall yn 'Lleoliad y Swydd' dim ond yn y DU y gellir gweithio yn y rôl/rolau y recriwtir iddynt drwy’r ymgyrch hon, ac ni cheir gwneud hynny dramor.

Dylai pob cais ar gyfer y swydd hon gael ei gyflwyno ar-lein, gan ddefnyddio system ymgeisio ar-lein Llywodraeth Cymru.  Os oes gennych nam sy’n golygu nad ydych chi’n gallu cyflwyno cais ar-lein, e-bostiwch DesgGymorthCydwasanaethau@llyw.cymru i ofyn am becyn ymgeisio mewn fformat gwahanol, neu i ofyn am addasiad rhesymol yn gysylltiedig a nam, er mwyn cyflwyno’ch cais.

I gyflwyno cais, fe fydd angen i chi gofrestru am gyfrif. I wneud hyn, cliciwch ar y botwm ‘Gwneud cais’ isod.  Os oes gennych chi gyfrif yn barod, rhowch eich manylion mewngofnodi.  Os nad oes gennych chi gyfrif, pwyswch ‘Cofrestru’.  Dim ond ychydig funudau mae’n cymryd i lenwi’r ffurflen cofrestru, sydd angen cyfeiriad e-bost er mwyn ei chyflawni.  Unwaith i chi gofrestru a mewngofnodi, bydd y ffurflen gais yn agor ar y sgrin.  Mae angen i chi gwblhau’r ffurflen yn llwyr a’i hanfon erbyn yr amser terfyn ar y dyddiau cau. 

I gwblhau cais yn y Gymraeg, gwnewch yn siŵr eich bod yn pwyso ‘Gwneud cais’ isod ar y dudalen hon (yn hytrach na phwyso ‘Apply’ ar y dudalen Saesneg).

Am ragor o wybodaeth ynghylch proses recriwtio Llywodraeth Cymru, gwelwch y Canllaw Recriwtio i Ymgeiswyr Allanol (dolen).

Wrth ddarparu tystiolaeth o’ch addasrwydd ar gyfer y swydd, rydym yn argymell eich bod yn cyfeirio at Fframwaith Cymwyseddau’r Gwasanaeth Sifil (dolen).

Dylai unrhyw un sy’n credu ei fod wedi’i drin yn annheg, neu sydd â chwyn am sut y cynhaliwyd y broses naill ai ysgrifennu at y Pennaeth Adnoddau, Llywodraeth Cymru, Parc Cathays 2, Caerdydd CF10 3NQ neu e-bostio desggymorthcydwasanaethau@llyw.cymru. Os ydych chi’n anhapus â chanlyniad y gŵyn a godwyd gyda Llywodraeth Cymru ac yn teimlo nad yw egwyddorion penodi ar sail teilyngdod drwy gystadleuaeth deg ac agored wedi’u bodloni gallwch gyflwyno’ch cwyn i Gomisiwn y Gwasanaeth Sifil (Saesneg yn unig).