Swydd Wag -- Dirprwy Gyfarwyddwr Dysgu Digidol

Egwyddorion Recriwtio

Wrth recriwtio, mae prosesau Llywodraeth Cymru yn seiliedig ar yr egwyddor o ddethol yn ôl teilyngdod ar sail cystadleuaeth deg ac agored, fel y disgrifir yn Egwyddorion Recriwtio Comisiwn y Gwasanaeth Sifil.

Manylion y Swydd

Y Grŵp Iechyd a Gwasanaethau Cymdeithasol
Uwch Wasanaeth Sifil 1
£70,000
Amser llawn (croesewir ceisiadau gan bobl sydd am weithio'n llawn amser, rhan-amser neu rannu'r swydd)
Parhaol
Cymru gyfan
Gall deiliad y swydd weithio o unrhyw un o swyddfeydd Llywodraeth Cymru. Fodd bynnag, oherwydd natur y gwaith a'r angen i gwrdd â Gweinidogion, mae disgwyl y bydd yr ymgeisydd llwyddiannus yn gweithio o Gaerdydd 2-3 diwrnod yr wythnos.

Dyddiad Cau

15/12/19 23:55

Pwrpas y Swydd

Mae'r Is-adran Dysgu Digidol yn rhan o'r Gyfarwyddiaeth Gweithrediadau yn y Grŵp Addysg a Gwasanaethau Cyhoeddus.

Mae agenda Dysgu Digidol Cymru yn elfen hanfodol o Addysg yng Nghymru: Cenhadaeth ein Cenedl a bydd yn rhan allweddol o'r gwaith o ddatblygu polisïau i'r dyfodol. Bydd gan ddeiliad y swydd gyfrifoldeb strategol am ddatblygu a gweithredu’r polisi dysgu digidol. Bydd yn arwain nifer o brosiectau lefel uchel yn ymwneud â blaenoriaethau'r Gweinidog a disgwylir iddo gyflawni'r rhain yn unol â'r fanyleb, o fewn y gyllideb ac ar amser. Bydd deiliad y swydd hefyd yn rhoi cyngor proffesiynol a chyngor ar bolisïau i Weinidogion ar arferion gorau, tueddiadau i'r dyfodol a gwerth am arian yn yr agenda ddigidol sy'n newid yn gyflym, gan alinio gwaith ag unrhyw gynlluniau digidol perthnasol eraill yn Llywodraeth Cymru. Bydd hyn yn cynnwys cyfrifoldeb am geisiadau, adroddiadau, cynlluniau manwl wedi'u costio, achosion busnes ac asesiadau risg.

Mae'r Is-adran yn cynnwys 41 o staff sydd wedi'u rhannu yn ddwy gangen ar hyn o bryd, gyda chyfrifoldeb am gyllideb refeniw o £5.3 miliwn a chyllideb gyfalaf o £50 miliwn yn 2019-20 gan adlewyrchu’r blaenoriaethau presennol. Bydd cyllidebau yn amrywio o un flwyddyn i'r llall yn unol â'r blaenoriaethau cyfredol a bydd angen i ddeiliad y swydd arwain wrth wneud y gorau o fuddsoddiadau Llywodraeth Cymru ym maes dysgu digidol drwy gydweithio a chyd-greu gyda rhanddeiliaid gan gynnwys cyflenwyr. Felly, mae angen craffter masnachol o'r radd flaenaf, sgiliau ymgysylltu rhagorol a llawer iawn o hygrededd o fewn y sector.

Fel rhan annatod o strategaeth Llywodraeth Cymru, mae'r tîm Dysgu Digidol yn gyfrifol am gefnogi a datblygu platfform dysgu digidol Llywodraeth Cymru, Hwb, fel gwasanaeth uniongyrchol, arloesol i athrawon a dysgwyr yn y sector ysgolion.

Cydraddoldeb ac Amrywiaeth

Mae Llywodraeth Cymru wedi ymrwymo i ddarparu gwasanaethau sy’n croesawu amrywiaeth ac sy’n hyrwyddo cyfle cyfartal. Mae hyn yn seiliedig ar Ddeddf Cydraddoldeb 2010 a bydd yn dilyn hyn ym mhob cam o’r broses recriwtio. Ein nod yw sicrhau bod yr ymrwymiadau hyn hefyd yn cael eu hymwreiddio yn ein harferion gwaith bob dydd gyda’n holl gwsmeriaid, cydweithwyr a phartneriaid.

Rydym wedi ymrwymo i fod yn sefydliad gwrth-hiliol a chynyddu amrywiaeth yn Llywodraeth Cymru, gan ddileu rhwystrau a chefnogi’n holl staff i gyflawni eu potensial. Rydym yn ymroi i recriwtio pobl Dduon, Asiaidd ac Ethnig Lleiafrifol a phobl anabl sydd heb gynrychiolaeth ddigonol yn Llywodraeth Cymru ar hyn o bryd.

Rydym yn croesawu ceisiadau gan bawb waeth beth fo’u hoedran, statws priodasol a phartneriaeth sifil (yn cynnwys yr un rhyw a’r rhyw arall), nam neu gyflwr iechyd, rhywedd, cyfeiriadedd rhywiol, beichiogrwydd a chyfnod mamolaeth, hil, crefydd neu gred, hunaniaeth o ran rhywedd neu fynegiant rhywedd.

Rydym yn Hyrwyddwr Amrywiaeth Stonewall, yn sefydliad Hyderus o Ran Anabledd Lefel 3 (Arweinydd). Mae pump Rhwydwaith Staff a noddir gan y Bwrdd yn allweddol i gefnogi’r gwaith hwn a darparu cefnogaeth i gymheiriaid (Ymwybyddiaeth a Chymorth Anabledd (DAAS); Rhwydwaith Staff o Leiafrifoedd Ethnig (MESN); Materion y Meddwl (Iechyd a lles meddyliol); PRISM (Pobl lesbiaidd, Hoyw, Deurywiol, Trawsryweddol, Rhyngrywiol +) a Menywod Ynghyd.

 

Hyderus o ran Anabledd

Mae Llywodraeth Cymru yn derbyn y diffiniad cymdeithasol o anabledd, sy'n cydnabod bod rhwystrau mewn cymdeithas yn gweithredu mewn modd sy'n analluogi pobl sydd â nam neu gyflwr iechyd, neu sy'n defnyddio Iaith Arwyddion Prydain. Rydym wedi ymrwymo i ddileu rhwystrau fel y gall pawb (neu'r rheini sy’n aelodau posibl o staff) berfformio ar eu gorau. Mae Deddf Cydraddoldeb 2010 yn defnyddio'r diffiniad meddygol o anabledd ("nam corfforol neu feddyliol sy'n cael effaith sylweddol a hirdymor ar allu person i gyflawni gweithgareddau arferol o ddydd i ddydd").

Rydym yn gwarantu y byddwn yn cynnig cyfweliad i unrhyw un sy'n anabl os bydd ei gais yn bodloni’r meini prawf sylfaenol ar gyfer y swydd. Mae bodloni’r ‘meini prawf sylfaenol’ yn golygu bod yn rhaid ichi ddarparu tystiolaeth yn eich cais i ddangos eich bod yn bodloni’r lefel ofynnol ar gyfer pob cymhwysedd. Mae’n rhaid ichi hefyd feddu ar unrhyw gymwysterau, sgiliau neu brofiadau sydd wedi eu nodi fel rhai hanfodol. Rydym wedi ymrwymo i gyflogi pobl anabl ac i hwyluso datblygiad eu gyrfa.

Os oes gennych nam neu gyflwr iechyd, neu'n defnyddio Iaith Arwyddion Prydain, ac yn dymuno trafod addasiadau rhesymol ar gyfer unrhyw ran o'r broses recriwtio hon, neu drafod sut y byddem yn eich cefnogi pe baech yn llwyddiannus, e-bostiwch DesgCymorthCydwasanaethau@llyw.Cymru cyn gynted â phosibl, a bydd aelod o'r tîm yn cysylltu â chi i drafod eich gofynion ac i ateb eich cwestiynau.

Gweithle Gwych i Gyn-Aelodau’r Lluoedd Arfog 

Mae’r swydd wag hon yn rhan o’r fenter Gweithle Gwych i Gyn-Aelodau’r Lluoedd Arfog


Sgiliau yn y Gymraeg

Mae Llywodraeth Cymru yn sefydliad dwyieithog, ac mae sgiliau Cymraeg yn gaffaeliad i ni.  Rydym yn annog ac yn cefnogi staff i ddysgu, datblygu a defnyddio’u sgiliau Cymraeg yn y gweithle.

 

Seiliwyd y rhestr isod o ofynion iaith y swydd ar asesiad gwrthrychol y rheolwr llinell ar ran Llywodraeth Cymru, o’r sgiliau yn y Gymraeg sy’n angenrheidiol i ymgymryd â dyletswyddau’r swydd benodol hon.

Ddim yn angenrheidiol i gyflawni dyletswyddau'r gwaith hwn

Partneriaeth Gymdeithasol

O fewn Llywodraeth Cymru, mae'r berthynas rhwng y cyflogwr a'r undebau llafur yn seiliedig ar bartneriaeth gymdeithasol. Rydyn ni'n credu mai’r ffordd orau o gyflawni ein nodau yw drwy sicrhau bod rheolwyr ac undebau llafur yn cydweithio.

Ein 3 undeb llafur cydnabyddedig yw:
•         PCS
•         Prospect
•         FDA

Mae cytundeb partneriaeth yn sail i'r berthynas hon. Mae'r cytundeb yn nodi sut y mae ein hundebau yn gweithio gyda Llywodraeth Cymru ar faterion fel:
•         cyflog
•         telerau ac amodau
•         polisïau a gweithdrefnau
•         newid sefydliadol

Mae ein cydweithwyr undebau llafur yn Llywodraeth Cymru yn cydweithio i roi cyfle i'w haelodau gael dweud eu dweud yn y gweithle. Maent yn sicrhau bod buddiannau eu haelodau yn cael eu hyrwyddo a'u diogelu. Maent hefyd yn helpu i leihau anghydraddoldebau a gwella telerau ac amodau.

Mae gan Lywodraeth Cymru hanes blaenorol rhagorol o weithio mewn partneriaeth gyda'i hundebau llafur. Rydyn ni'n annog staff i gymryd rhan. Rydyn ni'n eich cefnogi i ymuno ag undeb llafur cydnabyddedig, i sicrhau bod eich llais yn cael ei glywed yn y gweithle ac i ddysgu mwy am undebau llafur a gwaith partneriaeth.

Proses Asesu

Sut i ymgeisio

Dylid cyflwyno ffurflen gais wedi'i llenwi, CV diweddar, ynghyd â datganiad personol o'ch addasrwydd ar gyfer y swydd erbyn y dyddiad cau.  Dylai pob cais ar gyfer y swydd hon gael ei gyflwyno ar-lein, gan ddefnyddio system ymgeisio ar-lein Llywodraeth Cymru.  Os oes gennych anabledd sy’n golygu nad ydych chi’n gallu cyflwyno cais ar-lein, e-bostiwch SCSrecruitment@llyw.cymru i ofyn am becyn ymgeisio mewn fformat gwahanol, neu i ofyn am addasiad rhesymol yn gysylltiedig ag anabledd, er mwyn cyflwyno’ch cais.


I gyflwyno cais, fe fydd angen i chi gofrestru am gyfrif. I wneud hyn, cliciwch ar y botwm ‘Gwneud cais’ isod.  Os oes gennych chi gyfrif yn barod, rhowch eich manylion mewngofnodi.  Os nad oes gennych chi gyfrif, pwyswch ‘Cofrestru’.  Dim ond ychydig funudau mae’n cymryd i lenwi’r ffurflen cofrestru.  Fe fydd angen cyfeiriad e-bost arnoch i gofrestru.  Unwaith i chi gofrestru a mewngofnodi, bydd y ffurflen gais yn agor ar y sgrin.  Mae angen i chi gwblhau’r ffurflen yn llwyr a’i hanfon erbyn yr amser terfyn ar y dyddiau cau. 

I gwblhau cais yn y Gymraeg, gwnewch yn siŵr eich bod yn pwyso ‘Gwneud cais’ isod ar y dudalen hon (yn hytrach na phwyso ‘Apply’ ar y dudalen Saesneg).

Am ragor o wybodaeth ynghylch proses recriwtio’r Uwch Wasanaeth Sifil o fewn Llywodraeth Cymru, gwelwch y Canllaw Recriwtio i Ymgeiswyr Allanol yr Uwch Wasanaeth Sifil (dolen).  Mae canllawiau pellach ar Baratoi eich Datganiad Personol (dolen) hefyd ar gael.


Wrth ddarparu tystiolaeth o’ch addasrwydd ar gyfer y swydd, rydym yn argymell eich bod yn cyfeirio at Fframwaith Cymwyseddau’r Gwasanaeth Sifil (dolen).

Gwybodaeth arall am y swydd

Bydd y Tîm Recriwtio yn cydnabod derbyn eich cais drwy system Lywodraeth Cymru a phan fydd hynny'n briodol byddwch yn cael gwybod am ganlyniad y cyfarfod i lunio'r rhestr fer. Bydd gofyn i ymgeiswyr sy'n mynd yn eu blaenau i'r cam dethol nesaf gwblhau profion seicometrig ar-lein a chymryd rhan mewn Ymarfer Ymgysylltu â Staff. Bydd y ddau ddull asesu yn rhan o'r asesiad cyffredinol sydd ei angen ar gyfer yr ymarfer recriwtio hwn, yn ogystal â'r cyfweliad â'r panel dethol.

Bydd yr holl geisiadau ar gyfer y swydd hon yn ddienw yn y cam sifftio.

Bydd yr ymgeiswyr sy'n cael eu rhoi ar y rhestr fer yn cael profion seicometrig ar-lein a fydd yn cynnwys rhesymeg rifyddol a geiriol a thrafodaeth gyda seicolegydd. Byddwch yn cael dolen at y profion ar-lein ymhen 10 diwrnod i'r cyfarfod llunio rhestr fer. Cynhelir y cyfarfod llunio rhestr fer ar 18 Rhagfyr 2019.

Pwysig: os ydych yn Was Sifil ac yn gwneud cais i symud ar draws i'r swydd hon, ni fydd angen ichi gael prawf seicometrig ar-lein.

Os ydych chi wedi gwneud y profion seicometrig ar-lein yn y ddwy flynedd ddiwethaf, ni fydd angen ichi wneud y profion hyn eto ar gyfer yr ymarfer recriwtio hwn.

Gofynnir i ymgeiswyr ar y rhestr fer gymryd rhan mewn ymarfer ymgysylltu gyda grŵp bychan o staff ar 22 Ionawr 2020. Manylion pellach i ddilyn.

Bydd y cyfweliadau'n cael eu cynnal ar 31 Ionawr 2020. Fe'u cynhelir yn swyddfeydd Llywodraeth Cymru, Parc Cathays, Caerdydd CF10 3NQ. Bydd y cyfweliadau yn para rhyw 45 munud. Bydd y panel yn cael adborth ar ôl ichi gwblhau'ch profion seicometrig a'r Ymarfer Ymgysylltu â Staff, cyn ichi gael cyfweliad. Bydd eich cyfweliad yn un seiliedig ar gymwyseddau a fydd yn ystyried sut y bydd eich sgiliau a'ch profiad, fel y nodwyd yn eich CV a'ch datganiad personol, yn bodloni'r gofynion ar gyfer y swydd hon.

Os gofynnir i ymgeiswyr baratoi cyflwyniad ar gyfer eu cyfweliad, byddant fel arfer yn cael o leiaf un wythnos o rybudd ynglŷn â'r pwnc.

Nodwch os gofynnir ichi roi cyflwyniad, disgwylir ichi wneud hyn heb daflenni i'w dosbarthu na dyfeisiau electronig. Mae croeso ichi ddefnyddio cardiau atgoffa.

31 Ionawr 2020
Carla Lyne, Director of Operations on 0300 025 0096 or email carla.lyne@gov.wales

Mae'r swydd hon ar gau i ymgeiswyr.